عفوا حبيبي متقدرش ومتعرفش

الجزء الثاني

بسرعة كده نفتكر ياسين وأول يوم ليه في الكلية وأول مرة شاف فيها ريهام وازي حصل صدام في أول مقابلة وأزي الايام جمعت بينهم في تقارب هادىء ومن غير استعجال من أي حد منهم وازاي كل واحد منهم مبقاش خلاص قادر يبعد عن التاني
كانت أيام ياسين وريهام كلها فرح وسعادة وإحترام الطرفين لبعض وكانت ريهام دايما تتطلب من ياسين انه يخرجها وأن يكون أول مكان تشوفه يكون معاه هو وبس
ومع كده رغم أن ياسين كان يتحايل عليها أن يركبوا تاكسي إلا أنها كانت ترد وتقوله ياسلام عاوزنا نوصل بسرعة وملحقكش اتكلم معاك
كانوا بيمشوا مسافات كتيرة قوي وميحسوش بيها
في مرة من المرات اتمشوا من الكلية في العباسية لحد وسط البلد كانت ريهام بتحب وسط البلد وخصوصا شارع طلعت حرب
ياكلوا يشربوا يتفرجوا على المحلات وكان اكتر حاجة بتبسط ريهام انه بيخاف عليها كأنها في عينيه وهما ماشيين ويمنع أي حد من الاحتكاك بيها عن طريق إحاطته لها بذراعيه
مش زي اليومين دول يبقى البيه ماشي في ناحية والهانم ماشية في ناحية... تتعاكس بقه حد يحتك بيها مالوش دعوة
ومع التقارب اللي بينهم ده لسه لحد دلوقتي محدش نطق بكلمة بحبك للطرف الثاني كان كل واحد بيعتبر الكلمة دي تتحس متتقالش علشان متفقدش معناها مع تكرارها
وفي يوم من الايام كان ياسين وريهام على موعد في الكلية زي كل يوم
كانت الساعة تتدق 9 صباحا تلاقي وشوشهم بتتقابل في توقيت واحد
جت الساعة 9 وجت ريهام ومجاش ياسين
الساعة بقيت 9.15 ريهام دخلت المحاضرة وابتدي الدكتور الشرح ومكنتش حاسة بأي حاجة حواليها كان قلبها بيدق بعنف وابتدى القلق يبان على ملامحها
وكانت مع كل حد بيستأذن علشان يدخل المحاضرة تفتكره ياسين وميطلعش هو... تصاب بدوامة من الاحباط لغاية ماخلصت المحاضرة وخلص اليوم كله من غير ياسين
كانت حالتها أصبحت أكثر سوءاً وتسأل نفسها هو فين؟ أطمن عليه ازاي؟ الاقيه فين؟ بقالنا 90 يوم بنتقابل في نفس الميعاد والمكان أيه اللي حصل؟!
واخد بالك أيها القارىء العزيز 90 يوم في نفس الميعاد والمكان من غير موبايل ولا رنة ولا رسالة...ياريت نجرب نلغي التليفونات والرنات والرسايل مع اللي بنحبهم 90 دقيقة بس مش 90 يوم هنحس بطعم شوق ولهفة مختلف ياريت...
المهم ماعلينا روحت ريهام البيت ومافيش حاجة على بالها غير سؤال واحد ياسين مجاش النهارده ليه؟
وبعد كده بكام يوم جه ميعاد ريهام مع المحاضرات مرة تانية وخلال الايام دي كانت بتمني نفسها أنها أكيد هتشوفه
وجت الساعة 9 وانتظرت إنتظرت كتير قوي اليوم ده ومجاش ياسين برده
نسيت أقولكم من ساعة ماعرفوا بعض مهتمش كل واحد فيهم يبقى ليه أصدقاء اعتبروا ان كل واحد بيمثل للثاني الاصدقاء والاحباب ودنيته كلها جوا الكلية وبره الكلية
ريهام افتكرت ده وقالت يعني أسال مين تعبت والله العظيم تعبت من كتر القلق والتفكير حتى أن الشحوب بدأ يظهر على ملامح وجهها
فات أسبوع وريهام بدأت نفسياً تتعب وبدأو يقلقوا عليها في البيت مش بتاكل ولا بتشرب وومش مركزة تماما
كان طوال الاسبوع اللي فات ياسين على موعد مع نزلة برد شديدة جدا ورغم اهتمامه بمظهره الا انه يكره فصل الشتاء ويشعر بالاختناق عند ارتدائه ملابس ثقيلة
فعندما ترك ريهام في أخر مرة تقابلا
رجع البيت وهو حاسس بالعرق يتصبب منه بشكل مفزع ويرتعش وحالة قىء شديدة
حتى تتطور الموضوع إلى نزلة شعبية حادة ألزمته الفراش لمدة أسبوع بدون حركة
وفي أثناء مرضه سألته والدته والابتسامة تغطي وجهها عندما بدأ يتحسن تحسن طفيف
قولي ياحبيب ماما مين دي ريهام اللي كنت في عز تعبك ورعشتك وحرارتك العالية كنت بتقول جملة كده كررتها كذا مرة
ريهام استنى متمشيش وكلام كده مفهمتوش منك
كان ياسين يفتح بالكاد عينيه وابتسم ابتسامة خجل وصمت ولم يرد
وابتسمت الأم ابتسامة وقالت كبرت يا ياسين
في نهاية أسبوع مرض ياسين في يوم الجمعة كان قد بدأ يتماثل للشفاء وفي نيته أن ينزل الكلية يوم السبت
في هذا اليوم يوم الجمعة حدث ولا حرج عن حالة ريهام النفسية والعصبية لاتتحدث مع احد شاردة الذهن إلى أن انهكها التفكير فنامت نوما عميقا
وكعادة ريهام طوال أيام أسبوع مرض ياسين تنتظر عند التاسعة صباحاً
وفي هذه المرة جت الساعة 9 وجت ريهام وجه ياسين
عندما وقع نظر ريهام على ياسين لم تصدق نفسها وحست بان قلبها ينخلع بين صدرها
ظل الاثنان ينظرا كل منهما للأخر 10 دقائق دون أدني حركة
ومع نظر ريهام إلى وجه ياسين أغروقت عينيها بدموع لم تحتمل كتمانها
وبصوت متحشرج أخذت معه مبادرة الكلام بجملة حملت معها معانة وآلام الاسبوع كله وهي تنطق وتقول
أوعى تسبني تاني كده أوعى يا ياسين
لم يشعر ياسين بنفسه والا يديه تمسحان دموع ريهام وهو بيقولها مش هيحصل مش هيحصل ياست البنات أني أسيبك أبدا
أنا كنت بموت
ردت ريهام والدموع تملاء عينيها ماليش دعوة أموت معاك برده
ظلت ريهام طوال هذا اليوم عندما تتذكر ماحدث لها طوال هذا الأسبوع وهي تتحدث عنه مع ياسين إلا وتعاود البكاء برقة وبلهجة عتاب تكاد تعصف بقلب ياسين
فيعاود ويقول لها في كل مرة تبكي فيها مش هيحصل مش هيحصل ياست البنات أني أسيبك أبدا
وهنا انتبهت وكأنها قد نسيت شيئا مهما
ياسين لازم أعرف عنوان بيتك وانت تعرف عنوان بيتي وظلت تردد لازم يا ياسين ...... لازم يا ياسين....... لازم يا ياسين
قولتلك خلاص مش هبعد عنك تاني هتلاقيني في كل مكان بطلعلك فيه وبقولك أنا جنبك ياست البنات
هنا ابتسمت ريهام إبتسامة تحمل بين طياتها دلال وشقاوة وهي بتقول أي مكان أي مكان يا ياسين
رد عليها طبعا ياريهام أي مكان وجربي كده وانتي تعرفي أني مش بجامل بكلامي ده
سكتت شوية وقالتله بس في مكان صعب عليك ومستحيل لو أنت عاوز تشوفني في الوقت ده أنك تقدر وتعرف
يعني بصراحة كده يا ياسين وأنا في لجنة الإمتحان لاتقدر ولا تعرف تشوفني
صمت ياسين وسرح بذهنه قليلا وعندها سارعت ريهام بضحكة أكثر شقاوة شوفت بقه شوفت وريني بقه هتقدر وتعرف ولا
وعلشان هنشوف ياسين هيعرف ويقدر ولا........
تابعونا في الجزء الثالث