الجزء الثالث
عفوا حبيبي متقدرش ومتعرفش
يا زملائي ورفاقي المدونون تشجعيكم وآرائكم كانت السبب الحقيقي في خروج أي بوست للنور منتظر تعقيبكم على الجزء الثالث والأخير من بوست عفوا حبيبي متعرفش ومتقدرش وبعتذر أن كان في إطالة حصلت لكن وجهة نظري المتواضعة أن التشويق عنصر مهم جدا خصوصا إذا أحسن إستخدام عنصر التشويق وطبعا ده أنتو اللي تقولولي إذا كنت أحسنت استخدام العنصر ده ولا لاءعفوا حبيبي متقدرش ومتعرفش
وبعد الجزء الثالث والاخير من هذا البوست بنتهي دلوقتي من كتابة سلسلة من حلقات يوميات محتار في السنترال وانا بقول من أولها البوست ده هيكون على أجزاء علشان محدش يزعل بوجه شكرى العميق لكل من انتقدني عندما تابع معي أجزاء هذا البوست وكمان لكل واحد منكم ساهم هذا البوست في رسم ابتسامة ذكريات حلوة كانت عنده لما شاف أحداث ياسين وريهام ووجه ليا كلمات إطراء وشكر وشكر للمرة الثانية للعزيزة صاحبة مدونة سهر الليالي والتي كانت سبب مباشر في عن طريق بوست الحب الأول في خروج عفوا حبيبي متعرفش ومتقدرش للنور
مرة تانية بسرعة هنفتكر أحداث الجزء الثاني وأزاي ياسين وريهام افترقوا عن بعض أسبوع بسبب مرض ياسين وأزي كانت اول مقابلة بعد الاسبوع ده والطلب اللي طلبته ريهام من ياسين أنه يشوفها في لجنة الامتحان
يلا بينا نشوف ياترى ياسين هيعرف ويقدر يشوفها ولا.........
مرت الأيام وجه ميعاد إمتحانات نصف العام كانت إمتحانات ياسين بعد الظهر وإمتحانات ريهام الصبح وطوال الفترة اللي كانت قبل الإمتحانات كان بال ياسين مشغول أزاي يشوف ريهام ويقف قدامها في لجنة إمتحانها ويكون وجها لوجه ليها بحيث لاتتعدى المسافة بينهم شبر واحد
وعندما بدأت تقترب مواعيد الإمتحانات كان ياسين يشعر بالقلق ويسأل نفسه أزاي أثبتلها أني أقدر أكون قدمها ووشي في وشها على مسافة قريبة جداً أزاي أقدر أعمل ده أزاي؟؟! وبدأت الامتحانات فعلا ومع حب ياسين اللي ملا حياتها ومع المذاكرة والامتحانات نسيت ريهام موضوع انه يشوفها جوا لجنة الامتحان ومع كل يوم كان ياسين يحزن من نفسه على فشله من وقت بداية الإمتحانات وأحس ياسين أنه سيفشل في أن يفاجأ ريهام مفاجأة كبيرة خاصة انه لما يتبقى سوى إمتحان واحد وتنتهي إمتحانات نصف العام
وفي يوم من الأيام وأثناء إنشغال ياسين بالمذاكرة وبفكرة أنه إزاي يشوف ريهام دق جرس البيت في منزل ياسين
وكان على الباب ابن خالته أشرف أشرف بيربطه بياسين علاقة حميمة جدا رغم فارق السن بينهم وأشرف يبلغ من العمر 37 عاما
بعد ما دخل أشرف وبعد السلامات والتحيات انفرد ياسين بأشرف في غرفته وبدأ أشرف يطمئن من ياسين على أخباره وأخبار الكلية والامتحانات ولاحظ أشرف أن ملامح ياسين متغيرة وبدأ ياسين يسرد على مسامع أشرف الازمة التي يعيشها في كيفية الوصول إلى حل يهتدي إليه واللي عن طريقه هيقدر يفاجأ ريهام جوا لجنة الامتحان وبشرط أثناء سير الأمتحان وان يكون على مسافة وجها لوجه مع ريهام
صمت أشرف قليلا وقاله هو امتحانها أمتى؟
رد عليه وقاله بعد بكره
بعد طول فترة صمت من أشرف كان ياسين يشعر بأن الدقائق تسير ببطء وان القلق يكاد ان يعصف به متقلقش يا ياسين هتشوفها ووشك في وشها وكمان وهي قاعدة والامتحانات شغالة وبدأ أشرف يسرد على مسامع ياسين تفاصيل الخطة ومع سرده للتفاصيل كان ياسين صامتاً تماماً لايتحدث ولا توجد على وجهه غير علامات الانبهار والاندهاش
ولم يخرج ياسين من صمته غير جملة أشرف أيه رأيك في اللي قولته يا ياسين رد ياسين وقاله مش ممكن انت أحلى ابن خاله في الدنيا كلها وعانقه وقاله متشكر يا أشرف متشكر قوي
فات يوم والتاني كان ريهام وياسين على موعد مع بعض زي كل يوم امتحان لازم ياسين يطمئن على ريهام وفعلا اطمئن ياسين أنها دخلت الامتحان
وفي سباق مع الزمن رجع ياسين إلى منزله ودخل غرفته وبدأ يغير الملابس التي كان يرتديها وخرج من غرفته فقابلته أمه ووقفت للحظة تنظر إلى هيئة ياسين
نذكر جميعاً أن كل من يقترب من ياسين يعرف أنه يهتم بمظهره بشكل مفزع شاهدت والدته ياسين أخر غير اللي تعرفه يرتدى قميص لونه أسود أقل مايقال عنه أنه لايصلح لعامل نظافة لكي يرتديه وقت عمله مع كامل تقديري واحترامي لهذه المهنة ويرتدي بنطلون لونه رمادي اللون وبه العديد من الرقع وشعره غير مصفف
لم يمهل الوقت فرصة لوالدته فقد كان ياسين يسابق الزمن فعندما همت لتسأله ايه المنظر اللي قدامي ده كان رد ياسين جاهز وهو يغلق باب الشقة من ورائه ووجملته تقول لما أرجع هقولك يا أمي
وصل ياسين الكلية وذهب إلى مكتب شئون الطلبة يسأل عن واحدة أسمها هيام شاورت أحدي الموظفات بتأفف شديد وقالت لياسين مكتبها هناك اهو
أول ما وقع نظر هيام على ياسين بادرته وقالتله خير يابني عاوز أيه هيام تبلغ من العمر 35 عاما ولم تتزوج حتى الان قليلة الجمال وبعد أن عرفها على نفسه وقالها أنا من طرف الأستاذ أشرف علام
ردت هيام وقالت أهلا أهلا أهلا وبادرته وهي تقول
بس برافو عليك شكلك كده هيعرف يمثل الدور
تعال يلا معايا مافيش وقت وفور خروجهم من مكتب شئون الطلبة أرتفع صوت هيام وهي بتقول ياعم رزق يا عم رزق كان عم رزق يبلغ من العمر 60 عاما وقسمات وجهه تحمل ملامح مصرية خالصة يرتدي ملابس بسيطة والشعر الأبيض احتل الكثير من رأسه ويمسك بيديه سيجارة مصرية من النوع سوبر كيلوباترا وكان من أقدم العمال في الجامعة وعم رزق ده المسئول عن توفير المياه المثلجة للطلبة وقت الأمتحان وعنده عمال شباب بتساعده وبيوزعهم على لجان الأمتحان
بادل عم رزق هيام الصوت المرتفع ورد وقال أيوة يا آنسة هيام أنا جاي أهو أنتحت هيام بعم رزق جانبا بعيداً عن ياسين وتبادلا كلمات قليلة بعدها اتجه نظر عم رزق لياسين وقاله جاهز يا أستاذنا رد ياسين وقاله جاهز ياعم رزق رد عم رزق وقاله يلا شيد حيلك خد جركن الميا ده وأطلع على الدور الثالث لجنة 102
لم ينس ياسين أن يتوجه بخالص عبارت الشكر والثناء لهيام قبل ما يبتدي مهمته
وبالفعل حمل ياسين الجركن وأكواب من البلاستيك وبدأت خطواته وقلبه يكاد يخرج من بين صدره من عنف الدقات والضربات وصعد ياسين الدور الأول ثم الثاني ثم الثالث ووقتها شعر بأن قدميه لم تعد تستطيع حمله
وقتها سمع ياسين صوت جهور يقول يلا يابني إتحرك وخف رجليك شوي
ة كانت عين ياسين تنظر إلى أرقام اللجان مر بجوار لجنة 100 ثم 101 وأخير وجد نفسه أمام لجنة ست البنات وست الحسن والجمال
تمالك ياسين نفسه وبخطوات تملاؤها الثقة دخل لجنة 102 ونظر إليه مراقب اللجنة
وقال له يلا يابني بسرعة وبهدوء لف على الناس ووقع بصر ياسين على ريهام وكانت منهمكة في ورقة الإجابة ولم ترفع عينيها عن الورقة
ولم تشعر بوجود أحد في اللجنة وبدأ ياسين يلف على الطلبة إلى ان وصل للمقعد التي تجلس عليه ريهام
وبصوت يملاؤه حنان وحب وشوق الدنيا كله
تشربي ميا يا آنسه
رفعت ريهام عينيها وعندما شاهدت ياسين وجها لوجه أمامها خفق قلبها بشده
وهنا أود أن أشير إلى أنه قد يعجز شعراء الدنيا مجتمعين عن وصف ملامح ريهام في هذه اللحظة وعينيها تكاد تعانق ياسين
وبصوت خافت قال ياسين ياتري قدرت وعرفت ياريهام ولا لاء
تمت
